مدينة كتم

على قدر أهل العَزْمِ تأتى العزائِمُ وتأتى على قدرِ الكرام المكارِمُ
وتعظُمُ فى عين الصَّغيرِ صِغَارُها وتصغر فى عين العظيم العظائِمُ
حللت اهلا ونزلت سهلا
مرحبا بك فى منتداك منتدى مدينة كتم , وانشاءالله تفيد وتستفيد , ومنتظرين منك الكثير الكثير فلا تحرمنا من ابداعاتك ومقترحاتك ومساهماتك .
مدينة كتم

كن النخيل عن الأحقاد مرتفعاً . . يرمى بالصخر فيُلقى بأطيب .الثمر .منتدى مدينة كتم البيت الكبير وحلقة الوصل ورابط اخاء وتواصل لكل ابناء وبنات كتم الخضراء الوارفة بكل ميولهم الاجتماعية والثقافية والرياضية, والى كل من يحب الجمال والبراح والطيبة, فمرحبا بكم


    روعة الأسماء السودانية القديمة___ نقلا عن كاتبا الساخر جعفر عباس(ابو الجعافر) الله يطراه بالخير

    شاطر
    avatar
    hejazy bakhite
    مشرف القسم الثقافى

    عدد المساهمات : 29
    نقاط : 2688
    السٌّمعَة : 3
    تاريخ التسجيل : 12/08/2011
    العمر : 30

    روعة الأسماء السودانية القديمة___ نقلا عن كاتبا الساخر جعفر عباس(ابو الجعافر) الله يطراه بالخير

    مُساهمة من طرف hejazy bakhite في الإثنين أغسطس 22, 2011 10:29 am

    أسماؤنا السودانية القديمة الأصيلة، كان من الصعب بل المستحيل بأن تأتي لها باسم دلع، فمهما بلغت براعتك فلا يمكنك أن تدلّع أسماء مثل: بلة، الطريفي، أب جيبين، التجاني الخزين، عجبين، الزبير، أب كساوي، الصديق، فضل المولى، فتح الرحمن، عبد الجبار، البشير،عكاشة، الجنيد، تيراب، الريّح، الماحي، حمد النيل، حسب الله، جبارة الله، أب سقرة، البي كيفو، تميم الدار، جبر الدار، التلب، عمسيب، الجاك، الجزولي وغيرها..

    حتى النسوان عندنا كان أسماهن صلبة مثل ست النفر، الساتر الله، أم حقين، البتول، سكينة، التاية، نفيسة، النخيل، أم زين، بت الجقمتها وغيرها، والواحدة حتى لو أهلها كانوا متحررين، بالكتير يسموها الصندلية،

    والراجل ذاتو بيكون معجب باسم أمه المحتشم وتلقاه يحلف بيه في الصغيرة والكبيرة فنسمع: أنا ولدك آآآ ام زين .. أنا ولدك آآآ بخيتة... هسه أولاد الزمن ده يقولوا شنو ويحلفوا باسم منو.. معقول الواحد يقدر يقول: أنا ولدك يا عبق أو أنا ولدك يا رنا؟

    أسماء الأيام دي، .. مايعة تقررررّب تخت الاسم في التلاجة عشان يجمد ويبقى اسم رجال.

    شوفوا الأسماء دي: وائل، وضاح، وحيد، وليد، وديع، ربيع، مازن، تامر، لؤي، راني، هاني، نادر، حمادة، طلال، أيمن، مهند، إيهاب وغيرها.. ومع هذا يحظون باسماء دلع: : هنو، ولي، مزوني، تموري، عموري، ندوري، أيموني، هنودي، هوبة..

    وناس زمان ديل حتى كعكهم كان كعك رجال.. تدخل الكعكة في خشمك كده لما يغلبك تلوكها وتقعد تقرقش فيها كُرُم كُرُم زي الخروف القاعد يصقع في الجرة. أو كلب يكد في عظم، والآن جابوا لينا الكعك المايع بشتى أنواعه تدخل القطعة في خشمك تجي تلوكها تلقاها ساحت والتصقت بلثتك، وما تعرف ! نفسك هل أكلتها وللا ما كانت في قسمتك..

    نفس الشيء ده بينطبق على الولادة، زمان الواحدة تلد من خمسة لعشرة وكل سنة تساهم مع زوجها في ميزانية البيت بإنجاب طفل جديد، ومرات لو الظروف ساعدتها ممكن في نفس السنة تلد طفل وتشرع في وضع حجر الأساس لطفل جديد، ومرات الراجل ذاتو من كترة الولادة، ما بعرف أسماء أولاده! ومنو الأكبر ومنو الأصغر فيهم.. الراجل يسأل المَرَه: إنتِ آآآ الزينة دحين كبير ضيف الله وللا كرم الله ؟ فتجيبه الزينة باستغراب: أجي يا راجل: شن جاب ضيف الله لكرم الله! أنا لما ولدت كرم الله ده، ضيف الله كان يا دوووب بيحبا، لكنهم الاتنين مولودين! في نفس السنة المات فيها خالي عبد الرحمن..

    بنات الزمن ده الواحدة إلى أن يتخرج ولدها من KG2، حتى يقولوا ليك فلانة قاعدة تتوحّم.. وهو شن الوحم؟ الواحدة وحمها ذاتو مخالف وضد العادات والتقاليد.. تلقاها متوحمة ليها على تفاح لبناني أو زبيب إيراني أو عنب إيطالي أو مهند تركي، فيطلع ليها الولد باطل ومنعّم ومرخرخ ،والواحدة أصلها ما بتراعي ظروف زوجها.. زمان حتى وحم حبوباتنا وأمهاتنا كان وحم رجال ووحم بسيط وسهل التنفيذ ، الواحدة تتوحم على طين البحر أو أم بقبق فيقوم يطلع الولد لايوق وعبيط أو تتوحم على ويكاب مرس فيطلع الولد بتاع مرايس وشطوط! وكمونية .. (نحن ناس بتعيش حياتها بالكمونيّة والنيّة السليمة)..

    أهلنا الزمان كانوا متباشرين وحنينين، بكاهم شهر وعرسهم شهرين، والواحدة لما يموت راجلها من شدة الحزن والأسف والإخلاص، بدل أربعة شهور وعشرة يوم، تتحبس عليهو ثمانية شهور وعشرين يوم، لأنو أصلنا ما كنا بنعرف الشوية.. شهر العسل كان عندنا ثلاثة شهور، العريس يعديها في ضبّيح الخرفان وكسّير العناقريب، كل يوم يبدلوا ليهو في العناقريب زي بطاقات الاسكراتش.. أولاد الزمن ده شهر العسل عندهم ما بزيد ليهو من أسبوع بالكتير، وما سمعنا لينا بعريساً كسر العنقريب

    في الزمن المايع ده حتى شطتنا بقت مايعة وما بتحرق.. ونحن والله شعب لو ما حس بالشطة في جوفو تسوي تح تح، الأكل ما ينفعه. أنا ود التور البتنتّح ومن الشطة ما بقول أحححححح الزمن ده بقى زمن الكيتشاب والمايونيز، أما الشطة الخضراء وشطة القبانيت فزمنهم فات وغنايهم مات..

    وكلابنا برضو بقت مايعة وكسلانة ومسكينة وما بتهوهو في زول، الكلب تجي ماشي فوق ليهو ما يقول ليك هوْ، ولو بقى نشيط خلاص، يقوم ينبح فيك بتهوهوة واحدة تاني ما يزيدها، كأنه عامل ليك مس كول.. فقلت في نفسي: يا حليل زمان وأيام زمان.. لما الكلاب كانت بتسك الشفّع وتشرط هدومهم.. الآن الكلاب بقى مغضوب عليها وضالة ومهمشة وبتعيش على حافة النسيان ولو نظمت نفسها كويس ممكن تدخل الغابة أو تقيم في فنادق وتعلن التمرد وتعمل ليها حركة تمرد وممكن تسميها حركة تحرير الكلاب وتختصرها في كلمة (حتك).. Laughing Laughing Laughing Laughing
    avatar
    amir bukheit hussein
    المدير العام

    عدد المساهمات : 238
    نقاط : 3244
    السٌّمعَة : 21
    تاريخ التسجيل : 21/04/2011
    العمر : 35
    الموقع : Nairobi - kenya

    رد: روعة الأسماء السودانية القديمة___ نقلا عن كاتبا الساخر جعفر عباس(ابو الجعافر) الله يطراه بالخير

    مُساهمة من طرف amir bukheit hussein في الإثنين أغسطس 22, 2011 11:56 am

    روعه بحق وحقيقه
    لكن اجزم ان عمورى ده من عندك , لكن العارف عزو مستريح .
    طبعا انا من الزمن داك .


    _________________
    من وثق بالله أغناه ومن توكل عليه كفاه ومن خافه قلت مخافته ومن عرفه تمت معرفته.
    avatar
    hejazy bakhite
    مشرف القسم الثقافى

    عدد المساهمات : 29
    نقاط : 2688
    السٌّمعَة : 3
    تاريخ التسجيل : 12/08/2011
    العمر : 30

    رد: روعة الأسماء السودانية القديمة___ نقلا عن كاتبا الساخر جعفر عباس(ابو الجعافر) الله يطراه بالخير

    مُساهمة من طرف hejazy bakhite في الإثنين أغسطس 22, 2011 2:45 pm

    انت من الزمن داك لكن اسمك دا من المايعيين اهاهاهاهاهاها Laughing Laughing


    _________________
    [ flower size=24][/size[coالمسبعات flower lor=red]][/color]
    avatar
    amir bukheit hussein
    المدير العام

    عدد المساهمات : 238
    نقاط : 3244
    السٌّمعَة : 21
    تاريخ التسجيل : 21/04/2011
    العمر : 35
    الموقع : Nairobi - kenya

    رد: روعة الأسماء السودانية القديمة___ نقلا عن كاتبا الساخر جعفر عباس(ابو الجعافر) الله يطراه بالخير

    مُساهمة من طرف amir bukheit hussein في الإثنين أغسطس 22, 2011 3:12 pm

    لا لا صعبتها.
    طبعاوانا اقراء البوسق قلت اكيد هناك تعديلات حاصله , وبالفعل .
    ولكن هذا لا يمر على فطنة الكرام .


    _________________
    من وثق بالله أغناه ومن توكل عليه كفاه ومن خافه قلت مخافته ومن عرفه تمت معرفته.

      الوقت/التاريخ الآن هو الإثنين أكتوبر 15, 2018 7:54 pm