كلام حبوبات

mshaybo كتب:تعال هنا ياولد.(تجيك ام كُلُعلُع) انشا الله... شوف بالله جنس الولد الممسوخ دا .(الله لا غزّا فيك بركةآ المطرطش آ المعولق)......

هههههههههه
عليكى الله يا مديحه فتشى لينا معنى ام كلعلع ده .

طبعاً يا جماعة ....كلكم زمان ( أو لحدّى هسى) داعتكم حبّوبّاتكم جنس الدُعَا دا....
الحبّوبّات وما أدراك ما الحبّوبَّات........ عالم قايم بى ذاتو...... رايكم شنو نقتحم جزء بسيط من عالم حبّوبّاتنا؟؟؟؟

ياستى انتى شفتى حاجه ,., ياااااااااااااه ده نحنا عندنا حبوبه جارتنا الان (اتخرطمت) يعنى سكنت الخرطوم, دى انا مـتأكد انا تكون رقم واحد فى الدعا .

.....ابقوا داخلين......

انا وصلت .



فى البدايه خلّونا نتكلم عن موضوع الدُعَا دا تحديداً...... بنلقى انو مافى حَبّوبَة مسالمة ومسكينة 100%...... بالتالى لمن تهيج لازم تفك آخِرا.... غايتو انا زمان لمن كنتا عايزة اسمع لى دُعَا جديد بدوِّر ليك حبوبتى جنس دوير واقوِّما ليك بى نمره اربعه .....

ده انتى كنتى مصيبه !!

أها وتعال شوف.... راجمات
من العيار التقيل....تداعيك لمن تحلف تقول الدعاء ده بيخسف بيك هسه دى......
وكدى لو اخدنا مثال لو حبوبتك كوركت ليك و جيتا بعد مساافة....أها بعد تجيها تشبكك: انتا يا ولد اطرش؟؟؟؟؟ ( الطرش ال يقدِّد اضنيك ديل ان شا الله) اناديك من قبيل تجينى بعد ساعة ماشى تتقدَّل كَدِى تقول ماشيلَك فى شوك (تَمِش بطنك.. بركة الشيخ المكاشفى ).....
أمِش الجيران ديل قول لى حَجّة السُّرَة حبوبتى قالتلِك نَمِش على ناس المناسبة ديل متين؟ واوعك يا ولد أكان فتحت لك الباب بِنَّيتَا القشة ام روح دى ام عويناتن سُغار متل قدود الجلد دى توريها الجايبك شنو.... باقى هى سأآآلة (يسألا نكير بركة الله والرسول) الخبَّارة الشمشَارة.....

هههههههههههههههههههه قويييييييه .



أها بعد تجى راجع وتديها الخبر انو حَجّة السُّرَة قالت انو المشى للعقد الساعه 4 ومُودِّيكم ولدا الدكتور بى عربيتوالجديدة....
الدُعَا بقلب 180درجة ...... انتا يا يابا ان شا الله تتبارك وما تتشارك ... وتتعَّلا وما تتدَّلا....وأكان نافعنى يا يابا وبتترسَّل لى

دى طبعا حنك للمشوار الجاى .

ان شا الله يعدلا عليك محل ما تقبِّل ... ويديك الفى مرادك.....

امييييين , شفتى الفرص الزى دى اصلا ما بنفرط فيها .

وطبعا يا اخواننا فى الدُعَا السمح دا الحبوبات برضوا ما بقصَّرو تب .... واذا لحقن انبسطن منك و شكَّروك و دعن ليك دُعَا سمح على الايمان من كترت ما بتتكيف تقرب تركِّب ليك جناحين وتطير بيه...